Бүлүүгэ Саха Өрөспүүбүлүкэтин норуодунай учууталын Николай Афанасьевы чиэстээтилэр

Ил Дархан Айсен Николаев Бүлүү улууһун уонна Бороҕон нэһилиэгин бочуоттаах олохтооҕо, Аҕа дойду Улуу сэриитин бэтэрээнэ, буойун учуутал, Бороҕон агро-оскуолатын төрүттээбит, педагогическай үлэ бэтэрээнэ, РСФСР уонна Саха АССР үтүөлээх учуутала, ССРС үөрэҕириитин туйгуна, «Ытык Аҕа» бочуот аат хаһаайына Николай Афанасьевка Саха Өрөспүүбүлүкэтин наруодунай учуутала үрдүк ааты иҥэрбитэ.

Алтынньы 14 күнүгэр Бүлүү куоракка үөрүүлээх быһыыга-майгыга бу наҕарааданы Николай Афанасьевка туттардылар.

«Николай Иванович, өр сыллаах сыралаах уонна кыһамньылаах үлэҥ иһин Саха сирин педагогтарын, салалтатын уонна тус бэйэм ааппыттан махтал тылбын этэбин. Кытаанах доруобуйаны, этэҥҥэ буолууну уонна уһун үйэни баҕарабын», — диэн СӨ Үөрэҕирии миниистирэ Владимир Егоров эттэ.

Норуодунай учууталга өрөспүүбүлүкэ араас хайысхатыгар үлэлии-хамсыы сылдьар хас да көлүөнэ үөрэнээччилэрэ истиҥ махтал тылларын эттилэр.

«Аныгы олох үөрэҕирии систиэмэтигэр саҥа саҕахтары, уларыйыылары ирдиир. Билигин учууталлары саҥаҕа такайыахха наада, тэҥинэн хас да предметтэри үөрэтэр кыахтаах учууталлар наадалар. Ону тэҥэ үөрэтэр-чинчийэр үлэҕэ угуйан, иитээччи айар-тутар дьоҕурун арыйыахха наада», — диэн Николай Афанасьев бэйэтин санаатын үллэһиннэ.