Бөлүүн Өктөмҥө киһи өлүүлээх улахан баһаар таҕыста

Бэҕэһээ, муус устар 7 күнүгэр киэһэ 21.41 чааска баһаарынай сулууспаҕа Хаҥалас улууһун Өктөм нэһилиэгин Чапаево бөһүөлэгин Саввина уулуссатыгар турар 1997 сылга тутуллубут элбэх кыбартыыралаах дьиэҕэ баһаар тахсыбытын туһунан иһитиннэрии киирбит. Бу туһунан ЫБММ өрөспүүбүлүкэтээҕи салаатын пресс-сулууспата иһитиннэрэр.

Баһаарынайдар тиийиилэригэр дьиэ сарайын уот ылбыт. Уопсайа 18 киһини эвакуациялаабыттар, олортон түөрдүн өйө суох.

Быһылаан содулугар 2017 уонна 2018 сыл төрүөх икки оҕо, кинилэр 1993 сыл төрүөх ийэлэрэ уонна 1991 сыл төрүөх сэсиэттии кыбартыыраҕа олорбут дьахтар суорума суолланнылар. Тоҕус киһи араас эт-хаан эчэйиитин ылбыт: түөрдэ госпитализацияланна, биэс киһиэхэ амбулаторнай эмтэнии ананна.

Наука алын академиятын интэрнээтин баазатыгар эмсэҕэлээбиттэри олохтоохтуур маневреннай пуонда тэрилиннэ.

Оннугар силиэдэбэтэллэр уонна баһаарынай сулууспа исписэлиистэрэ үлэлииллэр. Хаҥаластааҕы борокуратуура бэрэбиэркэ тэрийдэ. Баһаар тахсыбыт төрүөтэ, хоромньу кээмэйэ уонна буруйдаах быһаарыллар. Бэрэбиэркэ түмүгүнэн сокуон ирдэбилигэр сөп түбэһэр быһаарыы ылыллыаҕа.