Бөҕү суох оҥоруу төлөбүрүн саҥа систиэмэтэ оҥоһуллуоҕа

Россия айылҕа харыстабылыгар министиэристибэтэ оҥорон таһаарааччылар эппиэтинэстэрин саҥа кэнсиэпсийэтин оҥоро сылдьар. Бу оҥорон таһаарыынан дьаркытанар урбаанньыттарга сыһыаннаах докумуон буолуохтаах.

Бэйэ табаарын хаҕын, сорҕотун суох гыныы саҥа быраабылаларын 2020 сыл кулун тутарыгар тахсыаҕа. Муус устар 1 күнүгэр диэри бырабыыталыстыба бигэргэтиэхтээх. Бу туһунан ТАСС иһитиннэрэр.

Олунньу ый бүтүүтэ быраабыла бырайыагын вице-премьер Виктория Абрамченкоаҕа бигэргэтиэхтэрэ.

«Кэнсиэпсийэ бигэргэтии бүтэһик түһүмэҕин ааһар уонна былааннаммыт кэмигэр олоххо киириэҕэ. Оҥорон таһаарааччылары кытта эмиэ сүбэлэспиппит. Муус устар 1 күнүгэр диэри бырабыыталыстыба бигэргэтиэхтээх», — диэн айылҕа харыстабылын министиэристибэтигэр эттилэр. Саҥа систиэмэҕэ өстүөкүлэ эрэ буолбакка, пластик, ньаалбаан бытыылкалар эмиэ киириэхтэрэ.

Санатан эттэххэ, бэрэсидьиэн Владимир Путин Федеральнай мунньахха туһаайыытыгар саҥа систиэмэ туһунан эппитэ. Оҥорон таһаарааччылар эппиэтинэстэрэ дойдуга 2014 сыллаахтан баар. Ол эбэтэр оҥорон таһаарааччы кини бородууксуйатын хаҕын суох оҥорууга эппиэттээх. Судаарыстыбаҕа экосбор харчытын төлүүр эбэтэр бөҕүн бэйэтэ дьаһанар. Билиҥҥитэ, ол 100% толоруллубат.