Баһаардартан эмсэҕэлээбит тыа хаһаайыстыбатын тэрилтэлэригэр көмө көрүллүөҕэ

Ил Дархан Айсен Николаев соругунан айылҕа баһаардарыттан эмсэҕэлээбит тыа хаһаайыстыбатын тэрилтэлэригэр өйөбүл көрүллүөҕэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Өрөспүүбүлүкэ үрдүнэн уопсайа 1 495,5 туонна от айылҕа баһаардарыттан эмсэҕэлээбитэ этиллэр: Таатта улууһугар – 463 туонна, Аммаҕа — 434,8 туонна, Чурапчыга – 234 туонна, Уус Алдаҥҥа – 140,5 туонна, Намҥа – 118,2 туонна, Мэҥэ Хаҥаласка – 24 туонна, Горнайга – 62 туонна, Томпоҕо – 18 туонна, Дьокуускайга – 30 туонна от.

Айылҕа баһаардарыттан олохтоммут уустук балаһыанньанан сибээстээн, балаҕан ыйын 26 күнүгэр Амма улууһугар муниципальнай таһымнаах ыксаллаах быһыы-майгы эрэһиимэ биллэриллибитэ. Уот Соморсун сэлиэнньэтин чугаһыгар 327,8 туонна оту сиэтэ, Эмис сэлиэнньэтигэр — 107 туонна оту.

«Ону тэҥэ,  Мээндиги уонна Сулҕаччы сэлиэнньэлэргэ ойуур баһаардарыттан уустук балаһыанньа олохтонно», – диэн этиллэр

Өрөспүүбүлүкэ тыа хаһаайыстыбатын министиэристибэтин мобилизационнай салаатын салайааччыта Виталий Никитин тириэрдэринэн, улууска бэйэ күүһүнэн соҕотуопкаламмыт оту харыстыыр биригээдэлэр тэрилиннилэр. Амма улууһун тыа хаһаайыстыбатын управлениета ойуур баһаарын умуруорууга таҕыста.

СӨ тыа хаһаайыстыбатын миниистирэ Александр Атласов бэлиэтииринэн, Ил Дархан соругунан айылҕа баһаардарыттан эмсэҕэлээбит тыа хаһаайыстыбатын тэрилтэлэригэр өйөбүл көрүллүөҕэ.

«Эмсэҕэлээбит улуустар сүөһү аһылыгын ылыы уонна сүөһү аһылыгын таһыы тырааныспартынай ороскуотун туһунан иһитиннэрии биэрэллэрэ ирдэнэр», – диэн этиллэр.

Иһитиннэрии ыйыллыбыт дааннайдарга олоҕуран оҥоһуллуохтаах: тыа хаһаайыстыбатын бородууксуйатын оҥорон таһаарар тэрилтэ аата, нэһилиэгэ уонна улууһа, ирдэнэр сүөһү аһылыгын кээмэйэ туоннанан, сүөһү аһылыгын сыаната солкуобайынан, сүөһү аһылыгын тиэйэр уонна сүөкүүр пуун, тиэйии икки ардын ырааҕа килэмиэтиринэн, сүөһү аһылыгын рекомендацияламмыт тарифтара (сол./т-км).

Ону тэҥэ улуустар ыйыллыбыт тыа хаһаайыстыбатын тэрилтэлэрэ бэлэмнээбит отторо айылҕа баһаардарыттан эмсэҕэлээбитин туһунан туоһу докумуоннары биэрэллэрэ ирдэнэр. Тыа хаһаайыстыбатын салаалара нэһилиэнньэҕэ сиһилии иһитиннэриини тириэрдиэхтэрэ.