Баһаары умуруорууга оборудование уонна тиэхиньикэ субвенция суотугар атыылаһыллыан сөп

Баһаардары умуруорууга федеральнай бүддьүөттэн үбүлээһин ньыматын РФ бырабыыталыстыбата регионнарга чуолкайдаата. Бу туһунан Россия премьер-миниистирэ Михаил Мишустин вице-премьердар суһал мунньахтарыгар иһитиннэрдэ.

«Билигин Россия регионнара аны субвенция суотугар баһаары умуруорууга туттуллар тэриллэри, туһааннаах тиэхиньикэни уонна оборудование атыылаһыахтарын сөп. Бу туһунан бырабыыталыстыба уурааҕар илии баттанна», — диэтэ Михаил Мишустин.

Федеральнай бүддьүөтүттэн үбүлээһин ньыматын, РФ бырабыыталыстыбата баһаарга былдьаммыт тыаны сөргүтүүгэ эмиэ көннөрөн оҥорбутун туһунан миниистир кэбиниэтин баһылыга бэлиэтээтэ.

Санатан эттэххэ, тыа баһаардарын умуруорууга уонна кэтээн көрүүгэ өрөспүүбүлүкэҕэ эбии 480 мөлүйүөн солкуобай көрүллүбүтэ.