Балаҕан ыйын 18 күнүгэр Опера уонна балет тыйаатырын үбүлүөйдээх сезона саҕаланыаҕа

Балаҕан ыйын 18 күнүгэр Суорун Омоллоон аатынан Опера уонна балет судаарыстыбаннай тыйаатыра 50-с үбүлүөйдээх сезонун саҕалыаҕа. Бу туһунан тэрилтэ пресс-сулууспата иһитиннэрэр.

«Бу сезон уратытынан бастакы кэнсиэргэ көрөөчү уонна артыыс оруолларын атастаһыылара буолар: ыалдьыттар сыанаҕа баар буолуохтара, оттон артыыстар — саалаҕа. Салгыы бырайыак түмүктэниэр диэри көрөөччү хас киэһэ ахсын театральнай-музыкальнай дьайыы тула сыанаҕа олордуллуоҕа», — диэн этиллэр.

Марафон чэрчитинэн ыытыллар бырагыраама: «Саҕаланыы» («Начало»), «La vita Barocco», «Ballet Gala» хореографиятын үс биэчэрэ, «Моцарт vs Гайдн» кэнсиэр, «Саха сирэ. Музыка. Современность» өрөспүүбүлүкэ судаарыстыбаннаһын күнүгэр ананар бырааһынньыктааҕы көрдөрүү, ону тэҥэ «Дьылҕа, имэҥ, таптал» («Судьба, страсть, любовь») кэнсиэр киэһэтэ.

Бырайыак алтынньы 4 күнүгэр «Соло, трио уонна квартет» камернай инструментальнай музыка киэһэтинэн түмүктэниэҕэ.