«Бекетов» ресторан «Саха сирин амтана» ас-үөл бэстибээлин кыайыылааҕа буолла

«Саха сирин амтана» ас-үөл бэстибээлин кыайыылааҕынан «Бекетов» ресторан ааттанна.

««Бекетов» ресторан гран-при хаһаайынынан буолла. Биһиги бэлиэтээн көрөрбүтүнэн, сыллата ас астааһын эрэ буолбакка, аһы киэргэтэн биэрии сайдар», — диэтэ Дьокуускай куорат баһылыгын солбуйааччы Георгий Васильев.

Кулинарнай искусствоҕа бастыҥ аатын ылар иһин «Атласовтар уһаайбалара», «Мацури», «Бекетов», «Houston», «Kitchen», «Alprana» уонна «Крыша» ресто-бар кытыннылар. Нэдиэлэ устата кыттааччылар күннээҕи, бырааһынньыктааҕы уонна сиэргэ-туомҥа туһуланар бүлүүдэлэри астаатылар. Куонкурус балаһыанньатынан, бүлүүдэлэр олохтоох оҥорон таһаарбыт бородууксуйатыгар олоҕуран оҥоһуллубут уонна саҥа, аныгы технология туттуллубут буолуохтаах.

«Саха сирин амтана» ас-үөл бэстибээлэ «Кыһын Саха сириттэн саҕаланар» бырааһынньык чэрчитинэн сыллата тэриллэр.

Ас-үөл бэстибээлэ Russian Event Awards — 2016 бэлиэ тэрээһин туризмын национальнай бириэмийэтин гран-при хаһаайына буолар.