Березовка бөһүөлэгин 30 ыала саҥа кыбартыыра күлүүһүн тутта

Орто Халыма улууһун Березовка бөһүөлэгин 30 ыалыгар саҥа кыбартыыралар күлүүстэрин туттарбыттарын туһунан «Якутия 24» телеханаал иһитиннэрэр. Ыалларга иккилии кыбартыыралаах 15 дьиэ күлүүһүн туттардылар.

ОДьКХ уонна энергетика миниистирэ Дмитрий Садовников салайааччылаах бырабыыталыстыба бөлөҕө Орто Халыма улууһугар сырытта. Хамыыһыйа тутулла турар эбийиэктэри көрдө, олохтоохтору кытта көрүстэ.

Березовка бөһүөлэгэр эбээннэр түптээн олороллор. Күн бүгүн манна 400 кэриҥэ киһи олорор. Бөһүөлэк 2002 сылтан саҕалаан куруук ууга барар. Онон, өрөспүүбүлүкэ бырабыыталыстыбата Березовканы көһөрүү былаанын ылыммыта.

Кэлэр сылга бу бөһүөлэккэ саҥа дьиэлэргэ уонна инфраструктура эбийиэктэригэр тиийэр 1,5 км суол оҥоһуллара былааннанар. Манна анаан 41 мөл. солк. көрүллүөҕэ.