Биэс киһи барыллаан бигэргэммит аналиһа Новосибирскайга туоһулааьыҥҥа ыытылынна

Саха сирин биэс олохтооҕун аналистарын чинчийии түмүгүнэн коронавируһунан ыалдьыбыттара барыллаан бигэргэннэ. Бу туһунан Ил Дархан Айсен Николаев бүгүн, коронавирустан олохтоммут усулуобуйа туругун боппуруостарынан суруналыыстары кытта күннэтэ ыытыллар көрсүһүү кэмигэр иһитиннэрдэ.

«Бүтэһик түөрт күн иһигэр Дьокуускайга биэс киһи аналиһыгар COVID-19 вируһа баара барыллаан бигэргэннэ. Аналистар Новосибирскайга туоһулааһыҥҥа ыытылыннылар. Уорбаланар дьон бары обсерваторга кииибиттэрэ», – диэн Айсен Николаев эттэ.

Маны тэҥэ түөрт саҥа барыллаан бигэргэммит түбэлтэ ЯТЭК хампаанньаны кытта сибээстээҕин бэлиэтээтэ.

Инники коронавируһунан ыалдьыбыттара чопчу бигэргэммит сэттэ киһи туруга этэҥҥэ.