Биир туроператор уонна биэс гостиница Россиянан айан кэшбэгын бырагырааматыгар киирдилэр

Саха сирин биир туроператора уонна биэс гостиницата Россия иһинэн айан ороскуотун төннөрүү бырагырааматыгар киирдилэр. Бу туһунан СӨ урбааҥҥа министиэристибэтин пресс-сулууспата иһитиннэрэр.

«Кыттааччыларынан «ГрандТур+» ХЭУо туроператор, ону тэҥэ «Лена», «Алаас», «Марракеш», «Азимут» уонна «Орто Дойду» гостиницалар буоллулар», – диэн этиллэр.

Бырагыраама атырдьах ыйын 21 күнүттэн — 28 күнүгэр диэри үлэлиэҕэ. Бу нэдиэлэ иһигэр Россия олохтоохторо дойду иһинэн сыл бүтүөр диэри айанныыр путевкалары ылар уонна ороскуоттарын сууматыттан 5 000-тан 15 000-ҕа диэри солкуобайы төннөрөр кыахтаныахтара.

Төннөрүллэр суума кээмэйэ путевкаттан тутулуктаах, ол эрээри тур эбэтэр гостиницаҕа олоруу уопсай устата түөрт хонуктан элбэх буолуохтаах.

Холобура, тур сыаната 25 000 — 49 999,99 солкуобай буоллаҕына — компенсация кээмэйэ 5 000 солкуобайга тэҥнэһэр. Тур 50 000 — 74 999,99 солкуобай буоллаҕына — 10 000 солкуобай төннөрүллэр. 75 000 солкуобайтан үрдүк сыаналаах буоллаҕына — 15 000 солкуобай төннөрүллэр.

Бырагыраамаҕа кыттарга атырдьах ыйын 21 күнүттэн — 28 күнүгэр диэри мирпутешествий.рф национальнай туристическай портал нөҥүө киирэн, региону ыйаҕыт уонна баар туроператордар эбэтэр гостиницалар этиилэриттэн талаҕыт.

Булгуччулаах усулуобуйа – privetmir.ru порталга эрдэттэн регистрацияламмыт «Мир» картанан айан талыллыбыт варианын төлөөһүн. Компенсация суумата биэс күн устата бэйэтэ төннөрүллүөҕэ.

2020 сыл атырдьах ыйын 21 күнүттэн — ахсынньы 20 күнүгэр диэри айаҥҥа турунуохха сөбө бэлиэтэнэр. Бырагыраамаҕа кыттар туроператордар уонна гостиницалар испииһэктэрэ мирпутешествий.рф сайтка тахсыаҕа.