Билибинэ уулуссаҕа турар сууллар кутталлаах дьиэттэн көһөрүүнү былаанныыллар

Билибинэ уулусса 46/5 нүөмэрдээх сууллар кутталлаах дьиэттэн көһөрүүнү былаанныылларын туһунан куорат дьаһалтатын пресс-сулууспата иһитиннэрэр.

Аллараа этээскэ хайдыы тахсыбытын түмүгэр сыбаайаны бөҕөргөтөр килиэккэни уонна маяктары туруорбуттар. Дьиэ олохтоохторо этэллэринэн, 2020 сыл сааһыгар хайдыы кээмэйэ 1 сантиметр, оттон от ыйыгар 12 сантиметрга тэҥнэспит.

Кэлэр икки-үс күн иһигэр дьиэ акылаатын ноҕуруускатын тэҥнээһин, сыбаайа килиэккэтин саҥардыы, маяктары кэтээн көрүү  үлэтэ ыытыллыаҕа.

«Дьиэ сууллар кутталлаах, онон сэрэтэр, суһал миэрэ ылыллыаҕа. Олохтоохторго маневреннай пуондаҕа көһөллөрүгэр сүбэлиибит. Сарсыҥҥаттан дьиэни чөлүгэр түһэрии үлэтэ саҕаланыаҕа», — диэн Дьокуускай баһылыгын олорор дьиэ уонна коммунальнай хаһаайыстыба боппуруостарыгар солбуйааччы Роман Сорокин эттэ.

Таас дьиэ 1980 сыллаахха тутуллубут, уруккута Доруобуйа харыстабылын министиэристибэтин дьиэтэ эбит. Кэлин эбии мас иккис этээс тутуллан медицина үлэһиттэрин олорор дьиэлэрэ буолбут.

2013 сыллаахха дьиэ муниципальнай бас билиигэ киирбит. Көрүдүөрдүү тииптээх 24 хоско уопсайа 43 киһи олорор.

Дьиэни 2019 сыл бүтүүтэ аварийнай диэн биллэрбиттэр, онон 2012-2017 сылларга хапсыбакка көһөрүү бырагырааматыгар киирбэтэх.