БКЭ ыытыллар пууннарыгар эбии бэйэни харыстанар сириэстибэлэри ыыттылар

Биир кэлим эксээмэннэри тутар пууннарга эбии дезинфекциялыыр сириэстибэлэри, мааскалары уонна бэрчээккэлэри ыыттылар диэн регионнааҕы Роспотребнадзор пресс-сулууспата иһитиннэрэр.

БКЭ-2020 ыытылларыгар оскуолалар төһө бэлэмнээхтэрин сыаналаатылар.

«Бэрэбиэркэ түмүгүнэн 20 оскуолаҕа эбии дезинфекциялыыр, салгыны ыраастыыр, бэйэни харыстанар сирисэтибэлэр, бактериялары өлөрөр лаампалар, антисептиктар тириэрдилиннилэр. Эбийиэктэри кичэйэн ыраастааһын ыытылынна», – диэн этиллэр.

Быйыл өрөспүүбүлүкэҕэ биир кэлим эксээмэни 5993 үөрэнээччи туттарар. Уопсайа 201 орто оскуолаҕа эксээмэннэри тутар пууннар тэриллиэхтэрэ.