Боксаҕа олимпийскай резервэ оскуолатыгар Артур Пахомов аатын иҥэриэхтэрин сөп

Саха сирин боксаҕа олимпийскай резервэ оскуолатыгар Россия үтүөлээх тренерэ Артур Пахомов аатын иҥэрэргэ этии киирдэ. Бу туһунан СӨ физическай култуураҕа уонна спортка министиэристибэтин пресс-сулууспата иһитиннэрэр.

«Бүгүн, сэтинньи 18 күнүгэр, ВКС быһыылаах ааспыт мунньахха министиэристибэтэ кэллиэгийэтин чилиэттэрэ биир санаанан этиини өйөөтүлэр. Быһаарыы салгыы Ил Дархан Айсен Николаев дьүүлүгэр таһаарыллыаҕа», – диэн иһитиннэриигэ этиллэр.

Россия уонна Саха сирин үтүөлээх тренерэ Артур Пахомов 1954 сыллаахха Ньурба улууһугар төрөөбүтэ. Дьокуускайдааҕы 1-кы №-дээх педагогическэй училищены уонна Саха судаарыстыбаннай үнүбэрсиэтин бүтэрбитэ.

Кини боксаҕа Саха сирин олимпийскай резервэ спортивнай оскуолатын старшай тренерэ, Саха сирин боксаҕа сүүмэрдэммит хамаандатын сүрүн тренерэ этэ.

Россия титулламмыт боксердарын Георгий Балакшины уонна Василий Егоровы иитэн таһаарбыта. Кинини «Гражданскай килбиэн» туйгун бэлиэнэн, Саха сиригэр бокса уонна физическай култуура сайдыытыгар кылаатын иһин наҕараадаларынан бэлиэтэммитэ.

Артур Пахомов 2020 сыл алтынньы 14 күнүгэр 66 сааһыгар биһиги кэккэбититтэн туораабыта.