Булуҥ оройуонугар 220 миэстэлээх саҥа оскуоланы арыйдылар

Бүгүн, ахсынньы 3 күнүгэр, Булуҥ оройуонун Күһүр сэлиэнньэтигэр 220 миэстэлээх саҥа оскуола үлэҕэ киирдэ. Бу туһунан ТАСС иһитиннэрэр.

3000 кв. миэтэрэ иэннээх тутуу Саха сирин инвестиционнай бырагырааматын үбүнэн тутулунна. Саҥа тутууга 550,2 мөл. солк. барбытын туһунан Ил Дархан Айсен Николаев иһитиннэрдэ.

«Оскуола уустук суоллаах нэһилиэнньэлээх пууҥҥа тутулунна, тутууга наадалаах конструкциялары олунньуттан муус устарга диэри кыһыҥҥы суолунан, онтон от ыйыттан балаҕан ыйыгар диэри уу суолунан таспыттара. 2013 сыллаахха Күһүр оскуолата бүтүннүү баһаарга былдьаммыта, онон олохтоохтор өр күүппүт баҕалара туолла», — диэн Айсен Николаев бэлиэтиир.

Саха сирин баһылыга саҥа тутуллубут икки этээстээх оскуолаҕа 196 оҕо үөрэнэр, ол иһигэр 9 үөрэнээччи чугас турар Сииктээх сэлиэнньэтиттэн үөрэнэллэрин эбэн эттэ. Сииктээххэ алын сүһүөх кылаастаах оскуола баар. «50 миэстэлээх интэринээт арыллыбытынан, кэлэр үөрэх сылыттан саҥа оскуолаҕа толору бырагырааманан үөрэнэр оҕо ахсаана элбиирэ күүтүллэр», — диэн Ил Дархан түмүктээн этэр.

Саҥа оскуоланы спорт саалатынан уонна ууну бэлэмниир носуос ыстаансыйатынан номнуо хааччыйбыттара. Оттон ититии Күһүргэ оскуола тутулларынан сибээстээн атырдьах ыйыгар үлэҕэ киирбит хочуолунайтан бэриллэр.