Быйыл Саха сиригэр уопсайа 148,3 килэмиэтир усталаах суол оҥоһулунна

«Куттала суох уонна хаачыстыбаллаах суоллар» национальнай бырагыраама чэрчитинэн Саха сиригэр 14 суол учаастага оҥоһуллан үлэҕэ киирдэ. Бу туһунан СӨ тырааныспар уонна суол хаһаайыстыбатын министиэристибэтин пресс-сулууспата иһитиннэрэр.

Бу ыйга өссө «Анаабыр» уонна «Абалаах» айан суолларыгар 39,3 килэмиэтир усталаах суолу оҥорон туттарыахтара. Салгыы ахсынньыга «Дьааны» айан суолугар 10 килэмиэтир усталаах кэрчик өрөмүөнүн түмүктүөхтэрэ.

Быйылгы үлэ былаана туолан иһэр. Болдьохтон хаалыы суох. Тутар-монтажтыыр үлэ 87 %-на туолла. Өссө түөрт эбийиэккэ үлэ кэлэр сылга салҕаныа.

2019 сылга саҕаламмыт «Куттала суох уонна хаачыстыбаллаах суоллар» национальнай бырагыраама чэрчитинэн, өрөспүүбүлүкэҕэ уопсайа 148,3 килэмиэтир усталаах суол оҥоһулунна, олортон 25,8 килэмиэтир — Дьокуускайга.