Бырааба суох 14 саастаах оҕо мотоциклынан киһини тү4нэри көтөн өлөрдө

Таатта улууһугар 14 саастаах оскуола оҕото 23 саастаах эдэр кыыһы мотоциклынан түҥнэри көтөн өлөрдө. Бу туһунан СӨ суолга куттал суох буолуутун хааччыйар судаарыстыбаннай инспекцията тириэрдэр.

Суол быһылаана Таатта улууһун Чычымах сэлиэнньэтин Кулаковскай аатынан уулуссатыгар атырдьах ыйын 12 күнүгэр киэһэ 23.00 чааска тахсыбыт.

«14 саастаах уол оҕото бэйэтин саастыы кыыс оҕону олордо сылдьан, регистрацияламмыт бэлиэтэ суох тырааныспарынан, суол кытыытынан хааман испит 23 саастаах кыыһы түҥнэри көппүт. Мотоцикл суоппара уонна пассажира араас эт-хаан эчэйиилээх балыыһаҕа киллэриллибиттэр», — диэн этиллэр.

Бэрэбиэркэ түмүгүнэн 14 саастаах суоппар тырааныспары ыытар бырааба суоҕа, айан кэмигэр бэйэтэ мотошлемнааҕа, олорсон иһээччи киһи шлема суоҕа быһаарылынна. Иккиэн арыгы испэтэхтэр.

Суол быһылаанын матырыйааллара салгыы силиэстийэҕэ бэрилиннилэр. Ону тэҥэ быһылаан туһунан иһитиннэрии сокуоннай саастарын туола илик оҕолор дьыалаларынан инспиэксийэҕэ тириэрдилиннэ.