Бырабыыталыстыба Чапаево баһаарга эмсэҕэлээбиттэргэ көмөлөһүөҕэ

Хаҥалас улууһун Чапаево сэлиэнньэтигэр уокка былдьаммыт дьиэлээх дьоҥҥо Саха сирин бырабыыталыстыбата үбүнэн көмөлөһүөҕэ. Бу туһунан бэрэссэдээтэли солбуйааччы э.т. Дмитрий Садовников салалталаах суһал хамыыһыйа мунньаҕар эттилэр.

Хаҥалас баһылыга Олег Иринеев эмсэҕэлээбиттэр билигин интернакка уонна аймахтарыгар олороллор диэтэ. Умайбыт дьиэҕэ 68 киһи олорбут, олортон 27-тэ — оҕо. Оройуон уонна нэһилиэк дьаһалтата билигин уокка былдьаммыт икки дьахтар уонна икки оҕо похоронатын тэрийэргэ көмөлөһөр.

Дмитрий Садовников оройуон салайааччыларыгар баһаары сэрэтэр үлэни күүһүрдэргэ, элбэх кыбартыыралаах дьиэлэргэ буруону биллэрэр сигналканы туруорарга сорудахтаата. ГоскомОБЖ ый аайы оройуоннартан баһаары сэрэтэр үлэ ыытыллыытын, буруорун биллэрэр тэрили ылыы, туруоруу туһунан отчуоту хомуйуоҕа.

Санатан эттэххэ, муус устар 7 күнүгэр Чапаевоҕа икки этээстээх дьиэҕэ баһаар буолбута. Икки улахан киһи, икки оҕо суорума суолламмыта, тоҕус киһи эчэйбитэ.