Бырабыыталыстыба саҥа састааба бигэргэннэ

Бэрэсидьиэн Владимир Путин миниистирдэр кэбининиэттэрин саҥа састаабын кытта көрүстэ. Саҥа дуоһунаска анаммыттарынан эҕэрдэлээтэ, ситиһиилэри баҕарда. Итиэннэ «Эһиги  үлэҕит ситиһиилээх буоларыгар бэйэҕит эрэ интэриэстээх буолбатаххыт, бу саалаҕа баар дьон бары оннук санаалаахпыт, ону ааһан дойду барыта үлэ таһаарыылаах буоларын баҕарар», — диэн бэлиэтээтэ. Бэйэтин этиитигэр дойду аҕа баһылыга ааспыт бырабыытылыстыба балачча таһаарыылаахтык үлэлээбитин эттэ. Бастатан туран,  экономиканы өрө таһаарыыга үчүгэй усулуобуйа олохтонно диэн ыйда, Михаил Мишустин сүрүннээһининэн саҥа бырабыытылыстыба үлэтэ саамай үрдүк көрдөрүүлэри ситиһэригэр Владимир Путин эрэнэрин эттэ. Премьер-миниистир дойду лидеригэр эрэлин-итэҕэлин иһин махтанна.

Оттон федеральнай былаас хайдах састаабынан үлэлиэҕэй? Премьер-миниистир Михаил Мишустин тоҕус солбуйааччылаах буолар. Мантан биирдэстэрэ бастакы солбуйааччынан үлэлиэҕэ. Санаттахха бу иннинэ Дмитрий Медведев уон солбуйааччылааҕа. Ол курдук Хотугу Кавказ дьыалаларыгар министерство эбээһинэһин аны экономиканы сайыннарыы министерствотыгар сүктэрилиннэ. Маны тэҥэ бырабыыталыстыба судаарыстыбаннай регистрация, кадаастыр итиэнэ картография федеральнай сулууспатын, доруобуйа харыстабылыгар  уонна медико-биологическай агентствоны сүрүннүөҕэ, оттон хамсаабат баайга-дуолга федеральнай агенствоны үп министерствота дьаһайыа5а.

Салгыы бырабыытылыстыба саҥа састаабын билиһиннэрэбин. Михаил Мишустин бастакы солбуйааччытынан Андрей Белоусов үлэлиэҕэ, Дмитрий Григоренко вице-премьер буолла уонна бырабыыталыстыба аппаратын сүрүннүөҕэ. Маны таһынан бырабыытылыстыба бэрэссэдээтэлин солбуйааччынан Виктория Абрамченко ананна. Маны тэҥинэн вице-премьердарынан Юрий Борисов, Татьяна Голикова, Алексей Оверчук, Марат Хуснуллин, Дмитрий Чернышенко уонна Юрий Трутнев буоллулар. Юрий Трутнев өссө Уһук Илин уокурукка Бэрэсидьиэн болмуочуйаллах бэрэстэбиитэлин быһыытынан үлэтин салгыаҕа.

Эбэн эттэххэ, премьер-министр Михаил Мишустин бу үрдүк солотугар ананан баран, миниистирдэр кэбиниэттэрин саҥа састаабын кытта көрсөн, бырабыыталыстыба уталыппака толоруохтаах  боппуруостарыгар тохтообута. «Маҥнайгы сүрүн соругунан Бэрэсидьиэн федерация мунньаҕар туһаайыыгар бэлиэтээбит чопчу этиилэрин олоххо киллэрии буолар», — диэн премьер тоһоҕолоото.