Чайаҥдаҕа тэнитиллибит мобильнай госпиталь Саха сиригэр хаалыаҕа

Чайаҥдатааҕы саппаас баайдаах сиргэ Россия ыксаллаах быһыыга-майгыга министиэристибэтинэн тэнитиллибит мобильнай госпиталь Саха сиригэр хаалыаҕа уонна ыксаллаах балаһыанньа үөскүүр түгэнигэр туһаныллыаҕа. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Билигин быстах кэмҥэ олохтуур пууннар сорҕолоро Талакантан Дьокуускайга тиэрдилэллэр.

«Мобильный госпиталь эмиэ өрөспүүбүлүкэ киин куоратыгар тиксэриллиэҕэ уонна ыксаллаах быһыы-майгы үөскүүр түгэнигэр туһаныллыаҕа», – диэн этиллэр.

Коронавирус инфекцията тарҕаныаҕыттан баахтабай бөһүөлэктэн 8,3 тыһыынча киһи таһаарыллыбыта бэлиэтэнэр. Билигин саппаас баайдаах сиргэ оҥорон таһаарыыны чөлүгэр түһэриигэ 2,4 тыһыынча киһи хаалан үлэлиир, кинилэр истэригэр биир да ыалдьыбыт киһи суох.

Ил Дархан Айсен Николаев ыйааҕынан бэс ыйын 1 күнүттэн Чайаҥдатааҕы баахтабай бөһүөлэктэн карантин эрэһиимэ толору уһулунна. Билигин алта киһи оннугар ситэ эмтэниини ааһар, анализтарын чинчийии түмүгэр COVID-19 вируһа көстүбэтэ.