Чайандатааҕы саппаас баайдаах сиргэ ньиэп утаҕын тутуохтара

Главгосэкспертиза Чайандатааҕы саппаас баайдаах сиргэ ньиэп утаҕын тутуу бырайыагын бигэргэттэ. Бу туһунан NEDRADV иһитиннэрэр.

Бу утах ньиэп баайдаах сири «Илиҥҥи Сибиир – Чуумпу океан» (ВСТО) магистральнай утаҕы кытта холбуур соруктаах уонна ньиэби бэлэмниир установкаттан 3 №-дээх гааһы кэлимник бэлэмниир сиргэ диэри тардыллыаҕа. Устата 70 килэмиэтиртэн тахса буолуоҕа. Үлэлэр бары Ленскэй оройуонун сиригэр-уотугар ыытыллыахтара, Ленскэй куораттан 150 килэмиэтир уонна Миирнэйтэн — 180 килэмиэтир тэйиччи сиргэ.

Бу эбийиэги тутууттан ураты, бырайыак ирдэнэр инфраструктураны тэрийиини учуоттуур. Ол иһигэр запорнай арматуралар, ыраастыыр уонна диагностикалыыр сирисэстибэлэри ыытар уонна тутар ситимнэр уктарын энергиянан хааччыйыыга ирдэнэр 10 кВ кыамталаах уот ситимин тардыы уонна киирии суоллары оҥоруу. Маны таһынан ньиэп утаҕын сүрүн былаһааккаларын сылы эргиччи хааччыйыыга уонна өрөмүөннүүргэ анаан федеральнай айан суолуттан киириилэр оҥоһуллуохтара.

Үлэлэр быйыл саҕаланаллара былааннанар. Билигин Чайандаҕа уопсайа сэттэ скважина үлэлиир, саҥалары үүттээһин салҕанар. 2025 сылга диэри манна ньиэби хостооһун кээмэйэ 5 мөлүйүөн туонна тиийэрэ былааннанар.