Чурапчы хаһаайыстыбалара ойуур баһаардарыттан тахсыбыт хоромньуларын ааҕаллар

Чурапчы улууһугар ойуур баһаардарыттан эмсэҕэлээбит хаһаайыстыбалар хоромньуларын сыаналааһыны ыыталлар. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Улуус үрдүнэн уопсайа 269 туонна кэбиһиллибит оту ойуур баһаардарын уота сиэбитэ этиллэр: Мындаҕаайыга — 172 туонна от, Хадаарга — 27 туонна, Мырылаҕа — 43 туонна от умайда.

«Эмсэҕэлээбиттэргэ көмө оҥоруу туһунан быһаарыы ылылла сылдьар. Хоромньу уопсай кээмэйин сыаналааһын ыытыллар», — диэн улуус баһылыга Андрей Ноговицын кэпсээтэ.

Улуустааҕы тыа хаһаайыстыбатын управлениета нэһилиэнньэҕэ үп-харчы өттүнэн өйөбүлү оҥоруу уонна саппаас пуондаттан оту биэрии үлэлэрин ыытар. Ону тэҥэ эмсэҕэлээбит тыа хаһаайыстыбатын бородууксуйатын оҥорон таһаарааччыларга оту атыылаһыы уонна тириэрдии салҕанар, ол иһигэр улуус бүддьүөтүн суотугар.

Билигин сүөһү аһылыгар кутталы үөскэтэр саҥа уот күөдьүйүүтүн сэрэтэр үлэлэр ыытыллаллара бэлиэтэнэр.

Санатар буоллахха, Ил Дархан Айсен Николаев сорудаҕынан өрөспүүбүлүкэ ойуур баһаардарыттан эмсэҕэлээбит хаһаайыстыбаларыгар көмө оҥоһуллуоҕа.