Чурапчы улууһун сүүмэрдэммит хамаандата «Федерация чорооно» өрөспүүбүлүкэтээҕи турнир Кубогын хаһаайынынан уонна кыайыылааҕынан буолбут. Бу туһунан улуус дьаһалтатын пресс-сулууспата иһитиннэрэр.
Чурапчы төрүт оҕунан ытыыга сүүмэрдэммит хамаандатын састаабыгар Борис Баишев, Николай Васильев, Эльвира Ефимова уонна Ульяна Гермогенова киирэллэр. Иккис миэстэни — Дьокускай, үһүс миэстэни Уус Алдан хамаандата ылбыт.
Дьокуускай куорат хамаандатын аатыттан кыттар Айыына Егорова уонна Ньурба улууһуттан Семен Замятин абсолютнай чемпион буолбуттара уонна анал бириистэри ылбыттара бэлиэтэнэр.
«Биирдиилээн киирсиигэ чемпионнарынан буоллулар: кыргыттарга — Айыына Егорова (Дьокуускай), уолаттарга — Михаил Гермогенов (Мэҥэ Хаҥалас), дьахталларга — Мария Федоров (Уус Алдан), эр дьоҥҥо — Борис Баишев (Чурапчы), бэтэрээннэргэ — Надежда Киприянова (Дьокуускай) уонна Виктор Елисеев (Үөһээ Бүлүү)», — диэн этиллэр.
Күрэхтэһиигэ 16 улуус хамаандатын састаабыгар, ону тэҥэ Хотугулуу-Илиҥҥи федеральнай үнүбэрсиэт уонна Арктикатааҕы судаарыстыбаннай агротехническэй үнүбэрсиэт хамаандатын састаабыгар уопсайа 141 спортсмен кыттыыны ылбыт.
