Чурапчы Кытаанаҕар саҥа оскуола-уһуйаан аһылынна

Чурапчы улууһугар Кытаанах сэлиэнньэтигэр 90/25 миэстэлээх В.С. Яковлев-Далан аатынан оскуола-уһуйаан аһылынна. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.

Оскуола-уһуйаан аһыллыытыгар Ил Дархан Айсен Николаев кыттыыны ылла. Ол курдук, 2016 сылга оскуола эргэ дьиэтигэр баһаар буолан, оҕолор үс дьиэнэн үөрэммиттэрэ. Ону тэҥэ сэлиэнньэҕэ уһуйаан дьиэтэ эргэ, хаарбах туруктаах.

«Кытаанахха оскуола-уһуйаан тутуута түмүктэнэрин биһиги бары күүттүбүт. Сотору кэминэн манна үөрэх саҕаланыаҕа. Бу мин биир булгуччулаах ирдэбилим буолар», – диэн иһитиннэриигэ этиллэр.

1,5 тыһ. кв. миэтэрэ уопсай иэннээх икки этээстээх оскуола-уһуйааҥҥа үөрэнэр кылаастартан ураты спортивнай саала, тренер хоһо, процедурнай и медицинскэй кэбиниэттэр, лингафоннай кэбиниэт, учительскай, аһыыр саала уонна буфет киирэр.

Доруобуйаларыгар хааччахтаах оҕолорго үөһээ тахсарга анаммыт платформа үлэлиир.

Саҥа оскуолаҕа биир сменаҕа 87 үөрэнээччи үөрэниэҕэ, оттон «Ньургуйаана» уһуйааҥҥа 30 оҕо сылдьыаҕа.

Эбийиэк тутуута «Тыа сирин кэлимник сайыннарыы» судаарыстыбаннай бырагыраамаҕа киирдэ.