Чурапчы олохтооҕо собо уҥуоҕуттан арааһы бары оҥорор

Чурапчы улууһун талааннаах кыыһа Зоя Ефимова собо уҥуоҕуттан оҥоһуга  куйаар ситимин нөҥүө тарҕанан бу күннэргэ өрөспүүбүлүкэ олохтоохторун сөхтөрдө.

Зоя  бу собо  уҥуоҕунан оҥорбут оҕуһа «Арт севера» күөн күрэскэ Гран-При үрдүк аатын ылбыта. Кыыс маннык ньымаҕа бастакы холонуута эрээри, тута киэҥ сэҥээриини ылбыта мээнэҕэ буолбатах. Кини икки сыллааҕыта Намнааҕы педколледжка уруһуй уонна черчение учууталын идэтин баһылаабыт. Маны тэҥэ талааннаах кыыс таҥаска акрил кыраасканан биир дойдулааҕа Кыыдаана Игнатьева үлэлэрин түһэрэн сакааска кытта үлэлиир. «Туллукчаан» оҕону сайыннарар кииҥҥэ кырачааннары уруһуйга, араас матырыйаалтан «3Д» оҥоһуктары таҥан таһаарарга сатабыллаахтык  үөрэтэр.

Эдэр педагог иитиллээччилэрэ хайыы-үйэ араас куонкурустарга ситиһиилээхтик кыттан саҕалаабыттар. Бу курдук өссө даҕаны саҥаттан саҥа ньымалары баһылаан, оҕолорго,төрөппүттэргэ айар үлэ күрэхтэһиилэрин ыытар, кытыннарар баҕа санаалаах.