Чурапчы оройуонун коммерческайа суох киинэ 1,3 мөл. солкуобай граны ылла

Чурапчытааҕы инбэлиит уонна доруобуйата хааччахтаах оҕону сайыннарыы  киинэ «Абсолют — помощь» пуонда граҥҥа күрэһин кыайыылаахтарыттан биирдэстэрэ буолла. «Логомобиль» диэн бырайыак 1 381 470 солкуобай граны ылла. Бырайыак сүрүн соруга — «Логомобил» Чурапчы нэһилиэктэринэн сылдьыытын тэрийии. «Логомобиль» — диэн инбэлиит, доруобуйатыгар хааччахтаах оҕо тылын-өһүн, туругун  көннөрөр, сайыннарар сыаллаах общественнай үлэһиттэр холбоһуктара. Аналлаах үлэһиттэр: логопедтар, оҕо быраастара, дефектологтар, эмтиир, сайыннарар физкультура үлэһиттэрэ, уйулҕа үөрэхтээхтэрэ уонна илбийээччилэр», — диэн Чурапчы улууһун дьаһалтатын пресс-киинэ иһитиннэрэр.

Бырайыак чэрчитинэн төрөппүттэргэ аналлаах сайыннарар, үөрэтэр семинардар ыытыллыахтара. Хамсааһын балаҕан ыйыттан саҕаланыа. Тэрилтэ «Кустук өҥнөөх кэмнэр» бырайыак «Үөрэҕирии, үөрэхтээһин, наука салаатын бырайыактарын өйөөһүн» салаатыгар кыайда. Грант кээмэйэ 650 184 солкуобай. Бырайыак сүрүн сыала — инбэлиит, доруобуйата хааччахтаах оҕолорго Чурапчы оройуонугар сайыҥҥы лааҕыр тэрийии.

Атырдьах ыйыттан грант олоххо киириэҕэ. 2020  сылга граны көмүскүүр иһин, хайа да сыллааҕар элбэх, 555 сайабылыанньа киирбитэ. Кыайыылааҕынан коммерческайа суох тэрилтэ 97 бырайыага ааттанна. Улуус  коммерческайа суох тэрилтэтэ бу сайын РФ Бэрэсэдьиэн гранын пуондатын бырайыактарын талыы күрэҕин кыайыылааҕа буолбута.