Чурапчы түөлбэтэ күөх төлөҥҥө холбонно

Бүгүн, ахсынньы 5 күнүгэр Ил Дархан Айсен Николаев Чурапчы сэлиэнньэтин Куогалы түөлбэтигэр күөх төлөн холбонуутун үөрүүлээх тэрээһинигэр кыттыыны ылла. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

«Бүтэһик сылларга Егор Борисов саҕалаабыт Илин Эҥэр улуустарын күөх төлөн ситимигэр холбооһун бырагыраамата тэтимнээхтик ыытыллар. Бүгүҥҥү күҥҥэ күөх төлөн Чурапчыга диэри кэллэ. Былааннаммыт 12 учаастактан, бэһис учаастак үлэҕэ киирдэ», — диэн Ил Дархан эттэ.

Билигин бу түөлбэҕэ икки аҥаар тыһыынча киһи олорор, икки уһуйаан, Чурапчытааҕы гимназия, колледж, лесхоз, «Чурапчы» кооператив үлэлииллэр.

Бэлиэ түгэҥҥэ Россия Федеральнай мунньаҕын Федерация Сэбиэтин кэмитиэтин бэрэссэдээтэлин солбуйааччы Егор Борисов кыттыыны ылла, Куогалы кини төрөөбүт түөлбэтэ буоларын бэлиэтээтэ.

«Маннык үтүө тэрээһиннэр сотору-сотору буолаллара үөрдэр. Саха сирин Ил Дархана билигин дойду салалтатын кытта ыкса үлэлэһэрин түмүгэр, сыллата үөскүүр боппуруостарбыт быһаарыллан эрэллэр. Бэрдьигэстээх уонна Чурапчы бөһүөлэктэрэ федеральнай бырагыраамаҕа киирэллэрин туһунан быһаарыы ылыллан, күөх төлөҥҥө холбонуута толору федеральнай үбүлээһиннэнэр буолла», — диэн Егор Борисов иһитиннэрдэ.

Маны сэргэ олохтоохтору хаарбах дьиэттэн көһөрүү бырагырааматынан, Куоҕалы түөлбэтигэр 200 ыал олорор түөрт элбэх кыбартыыралаах таас дьиэ тутуллунна.