Чурапчы улууһугар Иван Павлов туһунан документальнай киинэ сүрэхтэннэ

Буойун-учуутал Иван Павловка анаммыт документальнай киинэ Чурапчы улууһугар сүрэхтэннэ. Бу туһунан оройуон дьаһалтатын пресс-сулууспата иһитиннэрэр.

Документальнай киинэ сценарийыгар уонна туруоруутугар Алексей Амбросьев, Надежда Кузьмина уонна Иван Кривогорницын үлэлээтилэр. Хартыына Кыайыы 75 сылыгар анаан тэриллибит оройуоннааҕы пуонда үбүлээһининэн уһулунна.

«Норуот күүһэ — өйдөбүлүгэр диэн этиигэ, бүгүн, өссө төгүл итэҕэйдим. Киинэ үрдүк таһымнаахтык уһулунна уонна биир чаас иһигэр киһи умсугуйан көрөр. Быйыл өссө эбии Сталинградскай кыргыһыы геройугар Гаврил Протодьяконовка уонна Аҕа дойду Улуу сэриитигэр чурапчылары көһөрүүгэ анаммыт икки киинэ сүрэхтэниэҕэ», — диэн Чурапчы улууһун баһылыга Андрей Ноговицын кэпсээтэ.

Иван Михайлович Павлов Саха АССР үтүөлээх учуутала, П.А. Ойуунускай аатынан бириэмийэ лауреата, «Хотугу сулус» уордьан кавалера, Чурапчы улууһун бочуоттаах олохтооҕо. Сэрии кэмигэр Белгород, Дергачи, Харьков, Кенинсберг уонна Прибалтика куораттарын босхолооһуҥҥа кыттыбыта. Аҕа дойду сэриитин I степеннээх уонна Албан аат III степеннээх уордьанынан, «Германияны кыайыы иһин» мэтээлинэн наҕараадаламмыта. Өрөспүүбүлүкэтээҕи Чурапчы спортивнай оскуола-интернатыгар өр кэмҥэ история учууталынан, байыаннай салайааччынан үлэлээбитэ. 1964 сыллаахтан Аҕа дойду Улуу сэриитин кыттыылаахтарын үйэтитиигэ үлэлээбитэ. Чурапчыттан төрүттээх сэрии кыттыылаахтарын туһунан 30-ча кинигэ, брошюра, альбом ааптара.