Чурапчы улууһугар Слепцовтар дьиэ кэргэн араас көтөрү иитэллэр

Чурапчы улууһун Болтоҥо нэһилиэгэр кэтэх хаһаайыстыбалар сылгыны, ынах сүөһүнү тэҥэ көтөр араас көрүҥүн ииттэн, эбии дохуот киллэринэллэр.

Слепцовтар дьиэ кэргэн ынах сүөһүнү, сылгыны таһынан, куурусса, кус-хаас ииттэн, эбии дохуот киллэринэллэр. Быйыл 20 хааһы, 20 кууруссаны иитэн, инкубаторынан бэйэлэрэ сымыыт баттатан таһааран, 20-лии чоппуусканы атыылаабыттар, ордугун бэйэлэригэр хаалларынан, сибиэһэй көтөр этинэн сандалыларын аһын байыппыттар.

«Былырыын 30 куһу ииппитим. Барыстаах буоллаҕа дии. Былырыын үүтүнэн 470 тыһыынчаны оҥорбуппут, быйыл 300-тэн тахсара буолуо. Сүүрбэччэ сүөһүлээхпит, техниканы барытын бэйэбит үлэлээн ылабыт», — диир Болтоҥо нэһилиэгин олохтооҕо Марфа Слепцова.

Оттон нэһилиэккэ биир элбэх сүөһүлээх кэтэх хаһаайыстыбалаах Гаврил Кузьмин хотоно эргэрэн уонна, кыратык да буоллар, сүөһүтүн төбөтүн элбэтээри, саҥа хотон туттан, күн былдьаһыгар сылдьар.

Тыа дьоно чахчы да сүрүннээн сүөһүттэн аһаан-таҥнан олороллор. Онуоха бу туруу үлэһит дьон ыччакка үтүө холобур буолаллар.