Чурапчыга былыргы үйэ көмүүтэ көһүннэ

Чурапчы улууһун Дириҥ нэһилиэгин сиригэр былыргы үйэ көмүүтэ көһүннэ. Бу туһунан ТАСС иһитиннэрэр.

Аҕыйах ахсааннаах Хотугу норуоттар Россиятааҕы наукаларын академиятын Сибиирдээҕи салаатын уонна Гуманитарнай чинчийии үнүстүтүүтүн үрдүкү научнай үлэһитэ Виктор Дьяконов этэринэн, көмүү 14-17 үйэлэргэ сыһыаннааҕа сабаҕаланар.

«Көмүү уратыта диэн, киһини тигиллибит туоһунан эриллибит синньигэс былаахыларга сытыарбыттар уонна эмиэ оннук ньыманан бүрүйбүттэр. Кини тиэрэ, хоту диэки төбөлөнөн сытар. Көмүллүбүт киһи быһа холоон 25-35 саастааҕа сабаҕаланар», — диэн Дьяконов иһитиннэрэр.

Көмүү, быһа холоон, Саха сирин киин уонна арҕаа өттүн 14-16-с үйэлэригэр тарҕаммыт кулун атахтааҕы хойукку орто үйэлэр култуураларыгар сыһыаннаах. Учуонайдар бу кэми саха норуотун үөскээһинин уонна сүөһү иитиитин сайдыытын кытта сибээстииллэр. Киһини кытта көмүллүбүт маллартан көрдөххө, кини сэрииһит, булчут, эбэтэр балыксыт буолара сабаҕаланар.

«Көмүүгэ пальматтан оҥоһуллубут быһах (биилээх), ох саа икки тимир уһуга, кремнийтэн оҥоһуллубут уот уматар тэриллэр, чочуллубут таас, туос кыын, тирии быа, ону тэҥэ мас эрдии угуллубут», — диэн учуонай эбэн эттэ.