«Дьүрүһүй, хомуһум!» V-с өрөспүүбүлүкэтээҕи хомус күрэҕэ кэтэхтэн ыытыллыаҕа

Аан дойдутааҕы хомус киинин уонна түмэлин 30 сыллаах үбүлүөйүгэр анаммыт «Дьүрүһүй, хомуһум!» V-с өрөспүүбүлүкэтээҕи осколуола оҕолорун күрэҕэ кэтэхтэн ыытыллыаҕа. Бу туһунан хомус түмэлин пресс-сулууспата иһитиннэрэр.

Тэрээһин сүрүн сыалынан Саха сиригэр хомус туһунан билиини сайыннарыы, киэҥник тарҕатыы уонна саҥа талааннары арыйыы буолара этиллэр. Кыттыыны соҕотохтуу толорооччулар уонна ансаамбыллар ылыахтарын сөп. Дьүүллүр сүбэ Хомус түмэлин үлэһиттэриттэн уонна өрөспүүбүлүкэ култууратын деятеллэриттэн туруоҕа.

Ансаамбыллар истэригэр гран-при хаһаайына буолбут бөлөх Дьокуускайдааҕы «Бэс чагда» оҕо сынньалаҥын киинигэр уон путевканан наҕараадаланыаҕа. Соҕотох толорооччуларга хомус маастара Александр Шепелев оҥорбут анал бириистэринэн туттарыахтара.

Сайаапкалары уонна видеоҕа устуулары 2020 сыл муус устар 1 күнүгэр диэри туталлар.