Дьааҥыга киинэ саала арылынна

Дьааҥы улууһун Баатаҕай бөһүөлэгэр 60 миэстэлээх киинэ саала арылынна диэн «Якутия 24» телеханаал иһитиннэрэр.

«Киинэ тыйаатыра биэс миэтэрэлээх экраннаах, киинэни көрдөрөр, тыаһы-ууһу таһаарар тэриллэрдээх», — диэн СӨ Култуураҕа уонна духуобунай сайдыыга министиэристибэтин пресс-сулууспата иһитиннэрэр.

Саҥа киинэ саалын «Култуура» национальнай бырайыак чэрчитинэн федеральнай бүддьүөттэн үп көрүллэн туттулар. Билигин бөһүөлэк олохтоохторо «Аванпост», «Лев Яшин» уонна «Рыбка Поньо на утесе» киинэлэри көрүөхтэрин сөп.

«Якутия 24» телеханаал «Култуура» национальнай бырайыак чэрчитинэн өрөспүүбүлүкэҕэ өссө биэс киинэ саала арыллыахтаах, мантан үһэ федеральнай, иккитэ өрөспүүбүлүкэтээҕи бүддьүөттэн көрүллүөҕэ диэн иһитиннэрбитэ.