Даркылаах олохтоохторун дьиэлэриттэн эвакуациялыыллар

Дьокуускай куорат Даркылаах оройуонугар 162 киһи олорор 52 дьиэтин халаан уута ылла. Бу туһунан куорат уокуругун дьаһалтатын пресс-сулууспата иһитиннэрэр.

«Ыам ыйын 13 күнүн 12.00 чаас туругунан киин куорат 1-кы Пристанскай, 2-с Пристанскай, Сэбиэскэй Аармия 50 сыла уулуссаларыгар турар 52 дьиэни уу ылла. Бу дьиэлэргэ уопсайа 162 киһи олорор, ол иһигэр 44 оҕо», – диэн этиллэр.

Билигин олохтоохтору эвакуациялааһын ыытыллар, быыһыыр сулууспа икки бөлөҕө үлэлии сылдьар. Быстах кэмҥэ олохтуур пууҥҥа биэс киһи көһөрүлүннэ: икки дьахтар уонна үс оҕо, ол иһигэр биир кыһыл оҕо.