«ДФО-2020» форумҥа Саха сирин урутаан сайдыы сирдэрин көрдөрдүлэр

«ДФО-2020» онлайн-форум чэрчитинэн «ДФО-ҕа оҥоһуллубут» дьүүллэһии кэмигэр өрөспүүбүлүкэ Саха сирин урутаан сайдыы сирдэрин билиһиннэрдилэр. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

Өрөспүүбүлүкэ бырабыыталыстыбатын бэрэссэдээтэлин бастакы солбуйааччыта Кирилл Бычков икки урутаан сайдыы сиригэр 39 резидент бэйэлэтин үлэтин ыытарын туһунан кэпсээтэ. Бары бырайыактар инвестицияларын уопсай кээмэйэ 124 миллиард солкуобайтан тахса суумаҕа тэҥнэһэр, бүгүҥҥү күҥҥэ 55 миллиард солкуобайтан тахса үп көрүллүбүт, ол аата 44 %-на.

«Бырайыактары олоххо киллэрии эбии 9,8 тыһыынча саҥа үлэ миэстэтин тэрийиини учуоттуур. Бүгүҥҥү күҥҥэ бу көрдөрүү 70 %-на ситтэ. Бу ордук аҕыйах нэһилиэнньэлээх Уһук Илиҥҥэ олус суолталаах. Тэриллибит үлэ миэстэлэрэ үрдүк хамнастаахтар уонна тустаах квалификацияны ирдииллэр», – диэн бастакы вице-премьер бэлиэтээтэ.

«Якутия» ТОР олохтоох оҥорон таһаарыыны сайыннарар — тутуу матырыйаалларынан уонна оборудованиеларынан дьарыктанар дьоҕус уонна орто бизнес субъектарын бырамыысыланнай былаһааккалара буолар. Ону таһанын урутаан сайдыы сиригэр тэпилииссэ комплекса уонна кырыылыыр кластер үлэлииллэр.

«Южная Якутия» ТОР таас чоҕу хостуур бырамыысыланнай хампаанньалар бөлөхтөрүнэн буолар. Манна «Колмар» чох хостуур хампаанньа сүрүн резиденнэрин, икки хайаны байытар кэмбинээттэр тула кинилэр үлэлэрин хааччыйар тэрилтэлэр тэрилиннилэр. Урутаан сайдыы сирэ 52 миллиар солкуобайтан тахса кээмэйдээх инвестицияларын көрдөрүүтүнэн Уһук Илиҥҥэ биир бастыҥынан буолар, ону тэҥэ манна 6,6 тыһыынча саҥа үлэ миэстэтэ тэрилиннэ.

«Южная Якутия» ТОР резиденнэрин көрдөрүүлэрин көмөтүнэн өрөспүүбүлүкэҕэ таас чоҕу хостооһун иэнэ үрдээбитэ бэлиэтэнэр: 2020 сыллааҕы көрдөрүү ааспыт үс сыл уопсай көрдөрүүтүн куоһарыа уонна 20 мөлүйүөн туоннаттан тахса буолуоҕа. Кэнэҕэски бу көрдөрүү икки бүк үрдүөхтээх.

2020 сылга эбии алта саҥа резиден баар буолла. Инвестиция кээмэйэ 9,6 миллиард солкуобайынан үрдээтэ, үлэ миэстэтин ахсаана – 1069-нан.

Саха сирин бырабыыталыстыбата Уһук Илини сайыннарыы корпорациятыгар Аллараа Бэстээхтээҕи таһаҕаһы наардыыр киин бырайыагынан урутаан сайдыы сирин кыраныыссатын кэҥэтиигэ сайаапка ыыппыта этиллэр. Инвестиция кээмэйэ 245 мөлүйүөн солкуобайга тэҥнэһэрэ былааннанар, 34 саҥа үлэ миэстэтэ тэриллиэхтээх.

Ону тэҥэ «Колмар» оҥорон таһаарар баазатын инвестициятын 300 мөлүйүөн солкуобайынан улаатыннарар уонна эбии 15 үлэ миэстэтин тэрийэр кэҥэтии бырайыагынан сайаапка ыытыллыбат.

Сайаапкалары көрүү ахсынньы 24 күнүгэр «Якутия» ТОР уонна «Южная Якутия» ТОР кэтээн көрөр сэбиэттэрин сүбэ мунньаҕар былааннанар.