Дмитрий Коркин кэриэһигэр тустуу турнира саҕаланара икки күн хаалла

Дмитрий Коркин сырдык кэриэһигэр ыытыллар көҥүл тустууга норуоттар икки ардыларынааҕы гран-при турнира өйүүн саҕаланар. Быйылгы турнирга өрөспүүбүлүкэ аатыттан барыта түөрт ыйааһыҥҥа 65 бөҕөс кыттыаҕа. Күрэхтэһии алтынньы 11-13 күннэригэр ыытыллыа.

Күрэхтэһии билиэтэ алтынньы ый саҕаланыаҕыттан атыыга тахсыбыта. Билигин «Туймаада» атыы-эргиэн киинин, «Триумф» стадион уонна киин куорат тыйаатырдарын кассаларыттан дьон хото ылар. Өссө билиэти tesserus.com диэн сайтан электроннай ньыманан атыылаһаллар.

Уопсайа турнирга 30 дойдуттан 200-тэн тахса бөҕөс күөн көрсүөҕэ. Ол иһигэр Азербайджантан Хаджи Алиев, Индияттан — Сушил Кумар, Кубаттан — Йовлис Бонне уонна Турцияттан Чингисхан Эрдоган курдук ааттаах-суоллаах бөҕөстөр тустуохтара.

Саха сиригэр биир бастакынан түөрт киһилээх Япония хамаандата кэлэн, номнуо эрчиллэ сылдьар. Оттон бүгүн Монголия, Бурятия уонна Белоруссия сүүмэрдэммит бөҕөстөрө кэллилэр. Сарсын Америка, Турция, Грузия, Азербайджан спортсменнарын күүтэбит. Саха сирин хамаандата бу улахан түһүлгэҕэ сайыҥҥыттан ыла түөрт түһүмэҕинэн дьарыктанна.

«Бээтинсэҕэ тустуу маҥнайгы күнэ, уолаттар бэлэмнэр», — диэтэ Саха сирин сүүмэрдэммит хамаандатын хапытаана Виктор Рассадин.

Уопсайа Коркин аатынан бөдөн турнирга тустууктар 10 ыйааһыҥҥа киирсиэхтэрэ. Чөмпүйүөн үрдүк аатын ылбыт спортсмен 5 тыһыынча доллары ылыа. Оттон боруонса призердарга биирдии тыһыынча доллар туттарыллыаҕа.