Дмитрий Коркин кэриэһигэр тустуу турнирыгар билиэт атыыга таҕыста

Үтүөлээх тренер Дмитрий Коркин кэриэһигэр XII норуоттар икки ардыларынааҕы тустуу турнира алтынньы 11-13 күннэригэр Дьокуускай куоракка «Триумф» успуорка бэлэмнэнии киинигэр ыытыллыаҕа. Билиэт атыыга таҕыста. Бу туһунан СӨ успуорт министиэристибэтин пресс-сулууспата иһитиннэрдэ.

«Күрэхтэһии биир күнүгэр билиэт сыаната 500 уонна 800 солкуобайга тэҥнэһиэ, секторыттан уонна эрээтиттэн тутулуктаах», — диэн министиэристибэҕэ бэлиэтээтилэр.

Билиэттэри Дьокуускай куорат кассаларыттан: «Туймаада» атыы-эргиэн кииниттэн, «Триумф» успуорка бэлэмнэнии кииниттэн, Кулаковскай аатынан норуоттар доҕордоһууларын дьиэтиттэн, Опера уонна балет тыйаатырыттан, Саха академическай тыйаатырыттан, Эдэр көрөөччү тыйаатырыттан уонна www.tesserus.com сайтан атыылаһыахха сөп. Киирии билиэттэринэн сыаналаах бириистэри оонньотуохтара.

Турнирга 25-тэн тахса Россия регионнарыттан уонна тас дойдулартан кэлэн кытталлара күүтүллэр.