Дойду үрдүнэн үрүҥ ас сыаната үрдүө

Сэтинньиттэн Россия үрдүнэн үүт ас сыаната 10 % үрдүөн сөп. Бу туһунан «Известия» суруйда.

Электроннай бэтэринээринэй сертификация (ЭВС) олохтонорунан сибээстээн, сыана 10% үрдүөн сөп. Хонтуруол тиһилигэр сыыр, арыы, иэдьэгэй, үүт, мороженай уонна да атын үрүҥ ас көрүҥнэрэ киириэхтэрэ.

Ону тэҥэ 2019 сыл от ыйыттан дойду үрдүнэн сорох бэлэм үүт бородууксуйатын маркировкалыырга эксперимент саҕаламмыта. Бу миэрэлэр сымыйа бородууксуйа атыытын тохтоторго туһаайыллаллар.

«Атыы-эргиэн тэрилтэлэрэ регистрация ааһалларыгар саҥа анал тиэхиньикэ, бырагыраамалар уонна үлэһиттэр наада буолуохтара. Онон атыылаһааччы хармааныгар охсуон сөп. Ассоциация электроннай бэтэринээринэй сертификацияны 2020 сыл олунньу ыйыгар көһөрөргө этии киллэрэр», — диэн бытархай атыы хампаанньаларын түмсүүтэ Москватааҕы атыы-бырамыысыланнас балаататыгар суруйбут суругар этиллэр.

Балаата түмсүү сүрүгүн өйөөтө диэн бэлиэтэнэр.