Дьокуускай 23-с №-дээх орто оскуолатын учуутала «Сыл учуутала — 2020» буолла

Дьокуускайга сыллата ыытыллар «Сыл учуутала — 2020» идэ куонкурсугар куорат уокуругун 32 оскуолатын 34 учуутала кыттыыны ылла. Бу туһунан куорат дьаһалтатын пресс-сулууспата иһитиннэрэр.

«Сыл учуутала — 2020» куонкурус кыайыылааҕынан уонна 100 тыһыынча солкуобай суумалаах сүрүн бириис хаһаайынынан В.И. Малышкин аатынан 23-с №-дээх орто оскуолаҕа кытай тылын учууталынан үлэлиир Анна Кононова буолла.

Түмүк түһүмэххэ 17-с №-дээх орто оскуолаҕа английскай тыл учууталынан үлэлиир Варвара Хатылыкова, Саха политехническай лицейга обществознание учууталынан үлэлиир Александр Парфенов, 20-с №-дээх орто оскуолаҕа биология учууталынан үлэлиир Екатерина Чепрасова уонна Физико-техническай лицейга английскай тыл учууталынан үлэлиир Мария Саввина киирбиттэрэ бэлиэтэнэр.

Идэ куонкурсун кыттыылаахтара «Эссе», «IT — учуутал», «Үөрэх дьарыгын аналиһа», «Учуутал маастарыстыбата», ону тэҥэ «Образование» национальнай бырайыак» тиэмэҕэ форсайт-сессия хайысхаларынан бэйэлэрин маастарыстыбаларын көрдөрдүлэр.