Дьокуускай худуоһунньуктара -51 кыраадыска таһырдьа уруһуйдуохтара

Национальнай художественнай музей иһинэн үлэлиир «АРТ ХОЛЛ» мастарыскыай тохсунньу 24 күнүгэр Дьокуускайга «-50 кыраадыска пленэр» маастар кылааһы ыытыаҕа. Бу туһунан түмэл пресс-сулууспата иһитиннэрэр.

Пленэр кэмигэр худуоһунньуктар тыйыс тымныыга аһаҕас халлаан анныгар хартыыналары уруһуйдуохтара.

Афанасий Осипов аатынан хартыына галереятын тиэргэнигэр тохсунньу 24 күнүгэр 12.00 чаастан саҕаланар тэрээһиҥҥэ 16-тан үөһэ саастаах дьон кыттыыны ылыахтарын сөп. Кыттааччылар мустуулара 11.30 чааска былааннаммыт. Маастар кылаас сыаната 750 солкуобайга тэҥнэһэр.

Бары ирдэнэр матырыйаалы мастарыскыай биэрэр.

Дьокуускайга бастакы пленэр 2018 сыллаахха ыытыллыбыт, оччолорго салгын температуратын көрдөрүүтэ -46,5°С кыраадыска тэҥнэспит, 2019 сыллаахха -48,6°С кыраадыска, 2020 сыллаахха -48,5°С кыраадыска.