Дьокуускай куорат аннынан уу таһыма намтаата

Дьокуускай куорат аннынан Өлүөнэ өрүс уутун таһыма намтааһына бэлиэтэнэр. Бу туһунан Россия ыксаллаах быһыыга-майгыга министиэристибэтин өрөспүбүлүкэтээҕи салаатын пресс-сулууспата иһитиннэрэр.

«Кангаласс бөһүөлэктэн аллараа, Нам улууһун Үөдэй сэлиэнньэтин аттынан үс сиринэн мууһу эстэрии ыытылынна. Ыытыллыбыт үлэ түмүгэр харыы туоратылынна, Дьокуускай куорат аннынан сааскы халаан уутун таһыма намтааһына саҕаланна», – диэн этиллэр.

Дьокуускай куорат аннынан халаан уутун таһыма 854 сантиметрга тэҥнэһэр, быһыт үрдүгэ — 990 сантиметрга. Нам сэлиэнньэтин аттынан халаан уутун таһыма 750 сантиметр диэн бэлиэтэнэр, кутталы үөскэтэр көрдөрүү 950 сантиметрга тэҥнэһэр. Муус кыдьымаҕын уһуна 56 килэмиэтиргэ тэҥнэһэр.

Муус харыытын түмүгэр Кангаласс бөһүөлэгин аннынан уу таһыма өссө да үрдүк. Даркылаах оройуонугар 52 даача учаастагын уу ылла.

Куорат уокуругар эвакуацияламмыт дьону кылгас кэмҥэ олохтуурга уопсайа 300 миэстэлээх үс пуун тэрилиннэ.

Балаһыанньа күүркэйэр түгэнигэр Хабаровскайтан 20 быыһыыр сулууспа исписэлииһэ көмөҕө кэлэргэ бэлэмэ этиллэр.