Дьокуускай куорат баһылыгын талар быыбартан үс хандьыдаат уһулунна

Кулун тутар 26-28 күннэригэр ыытыллыахтаах өрөспүүбүлүкэ киин куоратын баһылыгын быыбарыгар кыттыыттан үс хандьыдаат уһулунна.

Киин талар хамыыһыйа дааннайынан, Дьокуускайдааҕы суут «Социальнай көмүскэл» баартыйаттан Микаэл Заболотнай, «Россия аччыгый бизнеһин баартыйатыттан» Илья Паймушкин уонна «Дьыала баартыйаттан» Владимир Федоров бэлиэтэниилэрин көтүрдэ.

Санатан эттэххэ, суукка кинилэр регистрацияларын «Родина» баартыйаттан хандьыдаат Айаал Прокопьев утарбыта. Эппиэттээччи Дьокуускай куорат быыбардыыр хамыыһыйата буолар.

Бүгүҥҥү күҥҥэ Дьокуускай куорат баһылыгын талар быыбарга хандьыдааттарынан «Биир ньыгыл Россияттан» Евгений Григорьев, КПРФ-тан Савва Михайлов, «Сиэрдээх Россияттан» Виталий Обедин, «Родина» баартыйаттан Айаал Прокопьев, ЛДПР баартыйаттан Евгений Рябченко уонна «Гражданскай платформаттан» Иван Комаров бааллар.