Дьокуускай кытыы сирдэригэр бөҕү-саҕы таһыы кыайтарбат

Дьокуускай куорат «Стерх» микрооройуон таһыгар баар айан суолугар бөх-сах мунньуллубута ыйтан орто. Даачалаахтар уонна ааһан иһээччилэр бөхтөрүн сотору-сотору быраҕан, билигин улаатан, бу сир сыбаалка кэриэтэ буолла.

«Стерх» түөлбэ олохтооҕо Юлиана Алексеева оҕолорун оскуолаҕа илдьэн иһэн, бу өрөһөлүү мунньуллубут бөҕү-саҕы күннэтэ көрөр. Дьиҥэ, эрдэ маннык хартыына олох да суоҕа диэн эдэр ийэ этэр.

Бу мунньуллубут бөх сотору кэминэн хаарга көмүллэрэ чахчы, онон олохтоохтор долгуйаллара оруннаах.

Олохтоохтор быар куустан олорбокко, Автодорожнай уокурук быраабатыгар сурук суруйан киллэрбиттэр да, күн бүгүҥҥэ диэри эппиэт кэлбэтэх. Маны туоһулаһаары, тустаах уокурук салалтатыгар тиийэ сырыттыбыт.

«Якутскэкосети» регионнааҕы оператор микрооройуон олохтоохторо дуогабар түһэрсибэттэр диэн маны хомуйартан аккаастаммыта. Автодорожнай уокурук быраабата операторы кытта үлэ ыыппыта,бу бөх-сах сотору кэминэн тиэйиллиэхтээх», — диэтэ Дьокуускай куорат Автодорожнай уокурук быраабатын салайааччытын солбуйааччы Иван Степанов.

Сыл саҕаланыаҕыттан бөҕү-саҕы хомуйарга саҥа сокуон киирбитэ. Бу үлэни сүрүннээччинэн “Якутскэкосети” диэн регион иһинээҕи операторы анаабыттара эрээри, куорат таһынааҕы бөҕү-саҕы таһыыга кэккэ уустуктары көрсөбүт диэн тустаах тэрилтэ дириэктэрэ Владислав Созонов куорат дьаһалтатын бу нэдиэлэтээҕи мунньаҕар этэн турар.

Хаһан барыта орун-оннун булара биллибэт. Бу мантан нэһилиэнньэ эмсэҕэлиир. Дьиҥэ, сокуон киирбитэ номнуо тоҕус ыйтан орто. Онон баар итэҕэстэри туоратан, үлэни тэтимирдэр кэм кэллэ.