Дьокуускай Пригороднайыгар оскуола автобуһа умайбыт

Бүгүн, муус устар 6 күнүгэр күнүн 13.30 чааска Пригороднай сэлиэнньэтигэр 12-с №-дээх оскуолаҕа оҕолору илдьэн испит автобус умайбыт. Бу туһунан киин куорат дьаһалтатын пресс-сулууспата иһитиннэрэр.

Покровскайдыыр суолтан сэлиэнньэҕэ туоруур суолга автобус кэлин өттө умайан тахсыбыт. Тута 16 оҕо уонна икки улахан киһи эвакуацияламмыт, эчэйбит киһи суох.

Оннугар суһал көмө биригээдэтэ уонна «ЯПАК» МУП бэрэстэбиитэллэрэ тиийбииттэр. Баһаарынайдар уоту умуруорбуттар, автобуһу өрөмүөннүүр туһунан быһаарыы ылыллыбыт. «ЯПАК» служебнай бэрэбиэркэ тэрийдэ.

Пригороднай сэлиэнньэ дьаһалтатын баһылыга Светлана Кармадонова тириэрдэринэн, оҕолор улахан дьон арыаллааһынынан оскуолаҕа сатыы тиийбиттэр.