Дьокуускайга 25 айан суолун хапытаалынай өрөмүөнэ салҕанар

«Куттала суох уонна хаачыстыбалаах айан суола» национальнай бырайыак чэрчитинэн Дьокуускайга уонна куорат аттынааҕы нэһилиэктэргэ 25 айан суолун хапытаалынай өрөмүөнэ ыытыллар. Бу туһунан куорат администрациятын пресс-сулууспата иһитиннэрэр.

«Билигин бытаарбыт эбийиэктэри асфальтааһыҥҥа болҕомто ууруллар. Ыарахан балаһыанньа «Гимеин» кольцевойугар, Курашова, Петровского, Три Сосны уонна Курнатовского уулуссаларга бэлиэтэнэр. Губина уулуссаҕа үлэ эрдэлээн, Курашова-Пояркова уулуссалар быһа охсуһууларыгар, куораттан чугас сытар нэһилиэктэргэ кэмигэр оҥоһуллан иһэр. Пригороднай нэһилиэккэ Новая уулуссаҕа үлэ түмүктэннэ уонна Маҕаҥҥа асфальтааһын бүтэн эрэр», — диэтэ «Главстрой» тэрилтэ салайааччыта Алексей Варламов.

«Куттала суох уонна хаачыстыбалаах айан суола» национальнай бырайыак чэрчитинэн 2020 сылга уопсайа 23.56 км айан суола, суол быһа охсуһуута өрөмүөннэниэҕэ. 28 эбийиэктэн 14-дэ куораттан чугас сытар нэһилиэктэр уулуссалара.

2020 сылга уопсай ороскуот федеральнай, өрөспүүбүлүкэ уонна муниципальнай бүддьүөттэн 1.5 миллиард солкуобайга тэҥнэһэр. Бырайыак олоххо киирэр кэмигэр, 2019 сылтан 2024 сылга дылы, 204,5 км суол оҥоһуллара, өрөмүөннэнэрэ былааннанар.