Дьокуускайга «Абилимпикс» национальнай чемпионат кыайыылаахтарын чиэстээтилэр

Бүгүн, ахсынньы 4 күнүгэр, Дьокуускайга «Абилимпикс» VI-с национальнай чемпионат түмүктүүр түһүмэҕэр кыттыбыт Саха сирин сүүмэрдэммит хамаандатын чилиэттэрин очно-дистанционнай быһыылаах чиэстээтилэр. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

«Абилимпикс-2020» — инбэлиит уонна доруобуйаларынан хааччахтаах оҕолор уонна ыччат ортотугар идэ мастарыстыбатын VI-с национальнай чемпионата сэтинньи 23-29 күннэригэр ааспыта.

Быйыл өрөспүүбүлүкэ сүүмэрдэммит хамаандатын састаабыгар 21 кыттааччы 18 компетенцияҕа үс категориянан кытынна: оскуола үөрэнээччитэ, устудьуон, исписэлиис.

Саха сирин хамаандата түмүк түһүмэххэ 10 мэтээли ылла: биир кыһыл көмүс, үс үрүҥ көмүс, 5 боруонса уонна биир түмүктүүр түһүмэх медальона. Ону тэҥэ мэтээл ахсаанынан тохсус миэстэни ылан, Россия регионнарын ТОП-10 рейтинигэр киирдэ.

«Өрөспүүбүлүкэ идэ таһымын үрдэтиини кытта сибээстээх боппуруостарга куруук тустаах болҕомто уурар. Чемпионат чэрчитинэн ыытыллар тэрээһиннэр үлэ булууга уонна таһымы үрдэтиигэ эрэ буолбакка, ону таһынан кыттааччылар тус бэйэлэрэ личность быһыытынан үүнүүлэригэр туһаайыллар. Маннык тургутууну ааспыт исписэлиитэр сотору кэминэн Саха сирин сайдыытыгар бэйэлэрин кылааттарын киллэриэхтэрэ диэн бигэ эрэллээхпин», – диэн вице-премьер Сергей Местников бэлиэтэ.

«Саха сирин хамаандатын бэрэстэбиитэлэ Ньургуйаана Васильева мааска оҥоруу түһүмэҕэр чорбойдо. Биһиги чахчы сөхтүбүт. Маннык маасканы бу компетенцияҕа бастакытын көрдүбүт», – диэн «Прикладной эстетика» компетенцияҕа сүрүн эксперт, Москваттан сылдьар Ольга Амчеславская эттэ.

«Медицинскэй уонна социальнай көрүү-истии» хайысхаҕа кыһыл көмүс мэтээли ылбыт Альбина Григорьева чемпионат иннинэ дьаныардаах бэлэмнэнии ыытыллыбытын бэлиэтээтэ. Өрөспүүбүлүкэ салататыгар уонна кыайыыга тирэх буолбут дьоҥҥо хамаанда аатыттан махталын биллэрдэ.

Национальнай чемпионат түмүк түһүмэҕин кыайыылаахтарыгар, призердарыгар уонна кыттааччыларыгар өйдөбүнньүк бэлэхтэр ыытыллыахтара.