Дьокуускайга алта оптуобуһу маршруттан уһуллулар

Дьокуускай куорат хамыыһыйата санитарнай ирдэбиллэри кэһии бэлиэтэммит алта оптуобуһу маршруттан уһулла. Бу туһунан куорат уокуругун дьаһалтатын пресс-сулууспата иһитиннэрэр.

«5-с, 15-с, 41-с №-дээх маршруттар чааһынай оптуобустара санитарнай ирдэбиллэри кэһиилэрэ бэлиэтэннэ. Коронавирус инфекцията күүскэ тарҕаныытын сэрэтиигэ туһаайыллар санитарнай быраабылалары уонна ирдэбиллэри тутуһуу туһунан ыйыы толорулунна», – диэн этиллэр.

Тырааныспарга уонна суол инфраструктуратыгар управление салайааччыта Николай Старостин тириэрдэринэн, «Якутия» технопарканы кытта бииргэ үлэлэһии түмүгүнэн, 41-с №-дээх маршрут биир оптуобуһугар салгыны ыраастыыр бактерициднай рециркулятор туруорулунна.

«Роспотребнадзор өрөспүүбүлүкэтээҕи салаата ХИФУ лабораториятын кытта рециркулатор оптуобус иһинээҕи салгыны төһө көдьүүстээхтик ыраастыырын бэрэбиэркэлиэхтэрэ. Кинилэр бигэргэтиилэрин кэнниттэн атын оптуобустарга эмиэ туруорар былааннаахпыт», – диэн Николай Старостин эттэ.

Алтынньы 7 күнүттэн барыта 57 оптуобус бэрэбиэркэлэннэ, олортон 33-һэ маршруттан уһулунна. 24 суоппары кытта быһаарар кэпсэтии ыытылынна. Оптуобустар кэһиилэри туоратыы кэнниттэн үлэлэрин сөргүтүөхтэрэ.