Дьокуускайга арыгы атыытыгар түөрт кэһиини буллулар

Полиция үлэһиттэрэ Дьокуускай куоракка анал үлэ ыытан, арыгы атыытын ирдэбилигэр сокуону кэһии түөрт түбэлтэтин арыйдылар. Бу туһунан ИДьМ пресс-сулууспата тириэрдэр.

Красильников уонна Чиряев уулуссаларыгар турар маҕаһыыннарга 20.00 чаас кэннэ арыгыны атыылыылларын туттулар. Үс лиитэрэ кэриҥэ арыгы бородууксуйата былдьанна.

Ону тэҥэ массыынаттан арыгы атыыта барара билиннэ. 29 саастаах киһиэхэ «Итирдэр утахтары сокуоннайа суох атыылааһын» ыстатыйанан административнай боротокуол тэрилиннэ.

Полиция үлэһиттэрэ Каландаришвили уулуссатыгар тустаах докумуона суох арыгы атыылыылларын быһаардылар.

Маннык хабааннаах рейдэлэр Дьокуускайга салҕаналлар.