Дьокуускайга арыгы сокуоннайа суох оҥоһуутун туппуттар

Өрөспүүбүлүкэ киин куоратын микрооройуоннарыттан биирдэстэригэр маркировката суох арыгы оҥоһуутун туппуттар. Бу туһунан ис дьыала министиэристибэтин пресс-сулууспата иһитиннэрэр.

«43 саастаах, үлэтэ суох, Дьокуускайтан төрүттээх дьахтар сирин учаастагын уонна олорор дьиэтин көрүү түмүгэр, 14 тыһыынча кураанах бытыылка, 9 тыһыынча хаппах, 8 тыһыынча этикетка, маны таһынан сокуоннайа суох оҥоһуллубут акцизнай мааркалары буллулар», — диэн иһитиннэриигэ этиллэр.

Биэдэмистибэ бэлиэтииринэн, ону тэҥэ араас полимернай иһиттэри, этиловай испиир суурадаһынын кээмэйдиир АСП-3 лабораторнай спиртометры булбуттар.

Булуллубут бирэдимиэттэри уонна матырыйааллары экспертнэй үөрэтиигэ ыыттылар. Уорбаланааччы дьахтар кылгас кэмнээх изоляторга киирдэ, салгыы боппуруос быһаарыллар.