Дьокуускайга биир кэлим эксээмэн (ЕГЭ) туһунан кинигэ сүрэхтэннэ

Кулун тутар 4 күнүгэр «Сомоҕо ситиһии историята» кинигэ сүрэхтэниитэ буолан ааста. Бу туһунан СӨ Үөрэххэ уонна наукаҕа министиэристибэтин пресс-сулууспата иһитиннэрэр.

Кинигэҕэ докумуоннарга, история чахчыларыгар, ыспыраапкаларга уонна бырайыагы олохтоспут дьон ахтыыларыгар олоҕурар, Саха сиригэр биир кэлим эксээмэни (ЕГЭ) олоххо киллэрии туһунан матырыйаллар киирдилэр.

СӨ Үөрэххэ уонна наукаҕа миниистирэ Владимир Егоров биир кэлим эксээмэн (ЕГЭ) — аан дойду үрдүнэн биллибит үөрэх хаачыстыбатын сыаналыыр ньыма буоларын бэлиэтээтэ.

«Бу кинигэ биир кэлим эксээмэн оҥоһуллуутун уонна олоххо киириитин историятын тиһилигэ эрэ буолбакка, бу тэрээһиҥҥэ олохторун олук уурбут дьоҥҥо ытыктабыл кэрэһитэ буолар. Бэйэтин туһугар, инникини ыралаан көрүү, хорсун санаа, сатабыллаах салайыы, бэриниилээх үлэ, эппиэтинэс уонна уопсай биир сыалы ситиһиигэ түмсүүлээх буолуу өрөгөйүн ырыата буолар»,– диэн Владимир Егоров эттэ.

Тэрээһин кыттыылаахтарыгар саҥа кинигэни бэлэх ууннулар.