Дьокуускайга чааһынай гараж уокка былдьанна

Дьокуускайга тохсунньу 11 күнүгэр олохтоох бириэмэ 20.38 чааһыгар Курошов уулуссатынан баар чааһынай гаражка баһаар тахсыбытын туһунан баһаарынай чааска этии киирбит. Бу туһунан Россия ыксаллаах-быһыыга майгыга министиэристибэтин Саха сиринээҕи салаатын пресс-сулууспата иһитиннэрэр.

«Баһаарынайдар саахал тахсыбыт сиригэр тиийиилэригэр гараж иһэ толору уотунан хабыллыбыт. Баһаар түмүгэр 24 кв. миэтэрэ иэннээх гараж иһэ барыта умайда», – диэн этиллибит.

Уот гараж иһигэр электрическэй сылытары туруоралларыгар баһаартан сэрэхтээх буолуу быраабылатын тутуһуллубатаҕыттан тахсыбыт.