Дьокуускайга дуобакка, саахымакка уонна оҕунан ытыыга онлайн турнир ааста

Ааспыт өрөбүллэргэ Дьокуускай куорат физическэй култуураҕа уонна спортка управлениета физкультурник күнүгэр аналлаах тэрээһиннэри ыытта. Бу туһунан «Спорт Якутии» иһитиннэрэр.

Тэрээһин чэрчитинэн дуобакка, саахымакка уонна оҕунан ытыыга онлайн быһыылаах күрэхтэргэ уопсайа сүүстэн тахса киһи кыттыыны ылла.

Саахымат турнирын түмүгүнэн эр дьон бөлөҕөр кыайыылааҕынан спорт маастарыгар кандидат Нариман Мустафин буолла. Иккис миэстэни саахымат блицыгар аан дойду чөмпүйүөнэ, аан дойду саахымакка федерациятын маастара Руслан Пахомов ылла. Саха сирин чөмпүйүөнэ Денис Назаров үһүс миэстэҕэ тигистэ. Дьахталлар бөлөхтөрүгэр Нюргуяна Баишева кыайыыны ситистэ. Кыргыттарга Арина Васильева кыайда, уолаттарга — спорт маастарыгар кандидат Никит Пестряков. 60 саастарыттан аҕа бэтэрээннэр икки ардыларыгар Александр Кравченко кыайда, 70 саастарыттан аҕа бэтэрээннэр истэригэр — Тускул Килбиэнэп.

64 харахтаах дуобакка эр дьон бөлөҕөр Афанасий Павлов кыайда. Дьахталлар бөлөхтөрүгэр Европа бастыыр иһин күрэҕин кыайыылааҕа, норуоттар икки ардыларынааҕы маастар Елена Кычкина кыайыыны ситистэ. Бэтэрээн эр дьоҥҥо Анатолий Стручков бастаата, бэтэрээн дьахталларга — Россия уонна Саха сирин үтүөлээх тренерэ Мария Бырдыннырова. Эдэр уолаттар бөлөхтөрүгэр Виктор Малышев кыайда, кыргыттарга – Сандаара Апросимова.

Оҕунан ытыыга отутча киһи күөн көрүстэ. Блок оҕунан 50 миэтирэҕэ ытыыга эр дьоҥҥо Виктор Скрыбыкин бастаата, дьахталларга — Юлия Маркова. Классическай оҕунан ытыыга Павел Алексеев-Стасов уонна Розалина Тимофеева кыайыыны ситистилэр. Үгэс буолбут оҕунан ытыыга Галина Филиппова уонна Иван Герасимов кыайдылар.